ಬೆಂಗಳೂರು : ಇಸ್ರೋ (ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ) ಇದೇ ಮೊದಲ ಬಾರಿಗೆ ರೆಕ್ಕೆ ಹೊಂದಿದ ರಾಕೆಟ್ ಉಡಾಯಿಸಲು ಮುಂದಾಗಿದ್ದು, ಈ ಮೂಲಕ ಮತ್ತೊಂದು ಇತಿಹಾಸ ನಿರ್ಮಾಣಕ್ಕೆ ಸಜ್ಜಾಗಿದೆ.
ಮೇಕ್ ಇನ್ ಇಂಡಿಯಾ ಪ್ರಯತ್ನದೊಂದಿಗೆ ನಿರ್ಮಿಸಲಾಗಿರುವ ಬಾಹ್ಯಾಕಾಶ ರಾಕೆಟ್ ಮೊದಲ ಯಾನಕ್ಕೆ ಇಸ್ರೋ ಸಿದ್ಧತೆ ನಡೆಸುತ್ತಿದೆ. ಆಂಧ್ರ ಪ್ರದೇಶದ ಶ್ರೀಹರಿಕೋಟಾದಲ್ಲಿ ಬಹುತೇಕ ಕ್ರೀಡಾ ಬಳಕೆಯ ವಾಹನದ (ಎಸ್ಯುವಿ) ಗಾತ್ರ ಮತ್ತು ತೂಕವುಳ್ಳ ನುಣುಪಾದ ಹೊಳಪಿನ ರೆಕ್ಕೆ ಹೊಂದಿದ ಬಾಹ್ಯಾಕಾಶ ನೌಕೆಗೆ ಅಂತಿಮ ರೂಪ ನೀಡಲಾಯಿತು.
ಹೀಗೆ ವಿನ್ಯಾಸಗೊಂಡಿರುವ ಮರುಬಳಕೆ ಮಾಡಬಹುದಾದ ದೇಶೀ ಬಾಹ್ಯಾಕಾಶ ರಾಕೆಟ್ ಪ್ರಯೋಗ ಯಶಸ್ವಿಯಾದಲ್ಲಿ ವೆಚ್ಚವನ್ನು ಹತ್ತು ಪಟ್ಟು ತಗ್ಗಿಸಬಹುದು ಎಂಬುದು ಇಸ್ರೋ ವಿಜ್ಞಾನಿಗಳ ವಿಶ್ವಾಸ. ಇದರಿಂದಾಗಿ ಪ್ರತಿ ಕೆಜಿಯಲ್ಲಿ 2ಸಾವಿರ ಡಾಲರ್ ನಷ್ಟು ಹಣವನ್ನು ಕಡಿಮೆ ಮಾಡಬಹುದಾಗಿದೆ. ಈ ತಿಂಗಳಾಂತ್ಯದಲ್ಲಿ ರಾಕೆಟ್ ಉಡ್ಡಯನವಾಗುವ ಸಾಧ್ಯತೆಯಿದೆ.
ಎಲ್ಲವೂ ಅಂದುಕೊಂಡಂತೆ ನಡೆದರೆ, ಮುಂಗಾರು ಆಗಮನಕ್ಕೆ ಮುನ್ನವೇ ಭಾರತದ ದೇಶೀ ವಿನ್ಯಾಸದ ಮರುಬಳಕೆ ಉಡಾವಣಾ ವಾಹನ ತಂತ್ರಜ್ಞಾನ ಪ್ರಯೋಗ ಪ್ರದರ್ಶಕವು (ಆರ್ಎಲ್ವಿ -ಟಿಡಿ) ಗಗನಕ್ಕೆ ಏರುವುದಕ್ಕೆ ಆಂಧ್ರ ಪ್ರದೇಶದ ಶ್ರೀಹರಿಕೋಟಾ ಬಂದರು ಸಾಕ್ಷಿಯಾಗಲಿದೆ. ಡೆಲ್ಟಾ ರೆಕ್ಕೆಗಳುಳ್ಳ ಈ ರಾಕೆಟ್ ಉಡಾವಣೆ ಬಳಿಕ ಮರಳಿ ಬಂಗಾಳ ಕೊಲ್ಲಿಯಲ್ಲಿ ಬಂದಿಳಿಯಲಿದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.