ಮಾಂಕುಃ ಸೋಂಪಣ್ಣಾ, ಒಂತೆ ಪುಗರೆ ಇತ್ತ್೦ಡ ಕೊರ್ಪಾರ ?..
ಸೋಂಪಣ್ಣಃ ನಿಕ್ಕ್ ದಾಯೆ ಮಾರಯ ಪುಗರೆ? ಯಾಪ ತೂಂಡಲಾ ಬಾಯಿಡ್ ಗುಟ್ಕಾ ಪಾಡೊಂದಿಪ್ಪುವೊ ?..
ಮಾಂಕುಃ ಗುಟ್ಕಾ ಬ್ಯಾನ್ ಆತ್೦ಡತ್ತೇ, ಸೋಂಪ್ಪಣ್ಣ.. ಐಕ್ಕಾದೇ ಯಾನ್ ಇತ್ತೆ ಬಚ್ಚಿರೆ,ಪುಗರೆ ತಿನ್ಪುನು... ದಾದ ಮಲ್ಪುನು ಪನ್ಲೆ, ಅಭ್ಯಾಸ ಆತ್ ಪೋತುಂಡ್ ತೂಲೆ..
ಸೋಂಪಣ್ಣಃ ಒಂಜಿ ಲೆಕ್ಕೊಡು ಎಡ್ಡೆನೆ ಆಂಡ್.. ಎಲ್ಯೆಲ್ಲ ಜೋಕುಲು ಪೂರಾ ಇತ್ತೆ ಗುಟ್ಕಾ ಪಾಡುವೆರ್.. ಆಂಡ ನಮ ಲೆಕ್ಕೊ ಬಜ್ಜೈ ಬುಳೆಪುನಕುಲೆಗ್ ಮಾಂತ್ರ ಕಷ್ಟೊ.. ಇತ್ತೆನೇ ಬಜ್ಜೈಗ್ ರೇಟ್ ಇಜ್ಜಿ, ನಣ ದಾದಪುಂಡೊ, ದೇವೆರೆ ಗತಿ..
ಮಾಂಕುಃ ಅತ್ತ್ ಸೋಂಪಣ್ಣಾ.. ನಿಕುಲು ಬಜ್ಜೈ ಬುಡುದು ಬೇತೆ ದಾದಾಂಡ್ಲಾ ಬುಳೆಯೊಳತ್ತೆ ?.. ಇಂದುವೆನೆ ನಂಬೊಂದು ಇತ್ತ್೦ಡ.. ತೂಲೆ.. ಇತ್ತೆ ಎಂಚಿನಾಂಡ್ ?.. ರೇಟ್ ಇಜ್ಜಿ ಪಂಡ್ ದ್ ಇತ್ತಿಲೆಕ್ಕೊನೆ ಕಂಗುಲೆನ್ ಮಾಂತ ಕಡಿಯರಾಪುಂಡೆ ?..
ಸೋಂಪಣ್ಣಃ ಬುಡು.. ನಮೊ ಕಾಲೊಗ್ ತಕ್ಕಾದ್ ಬದಲಾವೊಡ್ಯಾ.. ಇಜ್ಜಾಂಡ ಇಂದುವೆ ಆಪುನಿ..
ಮಾಂಕುಃ ಅವ್ ಬುಡ್ಲೆ.. ಇತ್ತೆ ಮೋದಿ ಬತ್ತ್೦ಡ ಬಿಜೆಪಿಗ್ ಸೀಟ್ ಜಾಸ್ತಿ ಬರು ಪಣ್ಪೆರ್.. ಈರೆನ ಅಭಿಪ್ರಾಯ ದಾದ, ಸೋಂಪಣ್ಣ ?..
ಸೋಂಪಣ್ಣಃ ಪೋ ಮಾರಾಯ, ನಿಕ್ಕ್ ಬೇತೆ ಬೇಲೆ ಇಜ್ಜಾ?.. ಪೋತ್ ಪೋತ್ ರಾಜಕೀಯದ ಬಗ್ಗೆ ಪಾತೆರುವತ್ತಯಾ.. ಅತ್ತಂದೆ ಟೀವಿಡ್ ಕೇಣ್ಲೆಕ್ಕೊ ಪ್ರಶ್ನೆ ಕೇಣೊಂದುಲ್ಲಾ ?..
ಮಾಂಕುಃ ಅಂಚತ್ತ್ ಸೋಂಪಣ್ಣಾ.. ಈರೆಗ್ ಗೊತ್ತುಂಡತ್ತಾ, ಎಂಕ್ ರಾಜಕೀಯೊಡ್ ಒಂತೆ ಇಂಟೆರೆಸ್ಟ್ ಎಚ್ಚಿಗೆ ಪಂಡ್ದ್..?
ಸೋಂಪಣ್ಣಃ ಮೋದಿನು ಮಿತ್ತ್ ಬರಿಯೆರೆ ಒರಿದಿನಕುಲು ಬುಡೊಡತ್ತಯಾ ?.. ಬಿಜೆಪಿಡೆ ಮಲ್ಲಮಲ್ಲಕುಲು ಸೇರೊಂದು ಕಚ್ಚಾಡೊಂದುಲ್ಲೆರ್, ಬುಕ್ಕ ಕಾಂಗ್ರೆಸ್ ದಕುಲು ಪೊಕ್ಕಡೆ ಬುಡುವೆರ ?.. ಮೋದಿ ಬರಾಂತಿಲೆಕ್ಕೊ ಮಾಲ್ಪೆರ ಎಂಚಿನ ಬೋಡೊ ಐನ್ ಮಾಂತ ಮುಕುಲ್ ಸೇರೊಂದು ಮಾಲ್ಪುವೆರ್, ತೂಲ..
ಮಾಂಕುಃ ಅವ್ ಅಂದ್, ಈರ್ ಪನ್ಪುನ.. ಆಂಡಲ ಆರ್ ಇತ್ತೆ ಚುನಾವಣಾ ಸಮಿತಿಗ್ ಅಧ್ಯಕ್ಷೆರ್ ಅತ್ತೆ? ಅಪಗಾಂಡ ಅರೆಗ್ ದೇಶ ಮಾಂತ ಸುತ್ತುದ್ ಪಕ್ಷೊಗ್ ಬೋಡಿತ್ತಿನ ಸಪೋರ್ಟ್ ಗೆಪ್ಪೆರೆ ಸಾಧ್ಯ ಇಜ್ಜಾ?..
ಸೋಂಪಣ್ಣಃ ಉಂಡು.. ಆಂಡ ಇತ್ತೆ ತೂಲ, ಮೋದಿ ಬತ್ತೆರ್ ಪಂಡ್ ದ್ ಜೆಡಿಯುದಕುಲು ಎನ್.ಡಿ.ಎ. ಬುಡುದು ಪೋವೊಂದುಲ್ಲೆರ್.. ಅಪಗ ಬಿಜೆಪಿಗ್ ಸೆಟ್ ಬ್ಯಾಕ್ ಆಪುಜ್ಜಾ ?..
ಮಾಂಕುಃ ಮೋದಿ 'ಸೆಕ್ಯುಲರ್' ಅತ್ತ್ ಪಣೊಂದ್ ಅಕುಲು ಬಿಜೆಪಿದಕುಲೆನ ಕಾರ್ ಒಯ್ತೊಂದುಲ್ಲೆರ್ ಅತ್ತಾ ಸೋಂಪಣ್ಣ ? ಈತ್ ದಿನ ಒಟ್ಟು ಸೇರ್ದ್ ಸರಕಾರ ಮಾಲ್ತಿಬುಕ್ಕ ಇತ್ತೆ ಬುಡ್ದ್ ಪೋಪಿನ ಸರಿ ಅತ್.. ಮುಕ್ಲೆಗ್ ವೋಟ್ ಮಾತ್ರೆ ಮುಖ, ದೇಶ ಅತ್ತ್..
ಸೋಂಪಣ್ಣಃ ಬುಡು ಮಾಂಕು.. ಎಂಚಿನ ಪೂರ ಆಪುಂಡ್ ಪಂಡ್ದ್ ತೂಕೊ.. ಬಿಜೆಪಿಗ್ 180 ಮಿತ್ತ್ ಸ್ಥಾನ ಬತ್ತ್೦ಡ ಈ ಸೆಕ್ಯುಲರ್ ಮಾಂತ ಬಲ್ತೊಂದು ಬರ್ಪೆರ್ ತೂಲ.. ಅಧಿಕಾರ ತಿಕ್ಕ್೦ಡ ಯೇರೆಗ್ ಬೋಡ್ಚಿ ಪಣ್ಲ ?.. ಮುಕುಲೆನ ಸಿದ್ಧಾಂತ ಮಾಂತ ಎಲೆಕ್ಸನ್ ಆಪಿನ ಮುಟ್ಟೊ ಮಾತ್ರ...
ಮಾಂಕುಃ ಅವ್ ಅಂದ್ ಧನಿ.. ದಾದ ಪೂರ ಆಪುಂಡ್ ಪಂಡ್ದ್ ತೂಕೊ.. ಯಾನ್ ಬರ್ಪೆ ಸೋಂಪಣ್ಣಾ.. ಕಡೆಸುಂಡು.. ಬಸ್ ತಿಕ್ಕುಜಿ ಬುಕ್ಕೊ..
ಸೋಂಪಣ್ಣಃ ಆವು.. ಎಲ್ಲೆ ಕಾಂಡೆ ಬೇಕ ಬಲ್ಲ.. ನಿನ್ನಡ ಹರಿಕಥೆ ಮಾಲ್ತೊಂದು ಬೇಲೆ ಮಾಂತ ಬಾಕಿ ಆಂಡ್ ತೂಲ..
ಮಾಂಕುಃ ಆವು ಸೋಂಪಣ್ಣಾ.., ಬರ್ಪೆ..