ಸೋಂಪಣ್ಣ: ದಾನೆ ಬೋಂಕು, ರಡ್ ದಿನ ಆಂಡ್ ಬೇಲೆಗ್ ಬತ್ತಿಜ್ಜಾ ?.. ತೋಟೊಡ್ ಬೇಲಿ ರಿಪೇರಿ ಮಾಲ್ಪೊಡು ಪಂಡ್ದಿತ್ತೆ ಅತ್ತಾ, ಕೈಕಂಜಿಲು ಪೂರ ತೋಟೊಗ್ ನುಗ್ಗೊಂದುಲ್ಲ ತೂಲ..
ಬೋಂಕು: ಅಣ್ಣ, ಎಂಕೊಂತೆ ಅರ್ಜೆಂಟ್ ಕುಡ್ಲಗ್ ಪೋಯೆರಿತ್ತ್೦ಡ್, ಅಂಚಾದ್ ಬರಿಯೆರಾಯ್ಜಿ.. ಇನಿ ಮಾಲ್ಪೆ, ಎಲ್ಲೆ ಎಲ್ಲಂಜಿ ಕುಡ ಪೋಯೆರ ಉಂಡು.. ಬೊಕ್ಕ ಸೋಮವಾರತಾನಿ ಬರ್ಪೆ..
ಸೋಂಪಣ್ಣ: ಅತ್ತ್ ಮಾರಾಯ, ದಾನೆ ಮಿನಿಶ್ಟರ್ ಮಿನಿ ಆದ್ ಬುಡಿಯೆನಾ ಎಂಚ? ವಾರೊಗ್ ನಾಲ್ ದಿನೊ ರಜೆ ಪಾಡ್೦ಡ ಮೂಲು ಕೆಲ್ಸ ಆಪಿನಿ ಎಂಚ, ನಿಕ್ಕ್ ಬಂಜಿಗ್ ತಿನಿಯೆರೆ ಕಾಸ್ ಒಲ್ತು ಬರ್ಪುಂಡು ?..
ಬೋಂಕು: ಐಕ್ ದಾಲ ಬಂಗ್ನ್ಹೊ ? ರಡ್ ದಿನೊ ಬೇಲೆಗ್ ಬತ್ತ್೦ಡ ನಾಲ್ ದಿನೊಕ್ಕು ಕಾಸ್ ಯಾರುಂಡು. ಇತ್ತೆ ಸಿದ್ದಣ್ಣೆ ಮುಖ್ಯಮಂತ್ರಿ ಆಯಿಬೊಕ್ಕ ಅರಿಕ್ ಕಿಲೊಕ್ಕ್ 1 ರೂಪಾಯಿ ಮಾಲ್ತೆರತ್ತೆ ? ನಣ ಬೆನ್ಪುನೆ ದಾಯೆ ? ಇಲ್ಲಡ್ ಕುಲ್ದೆ ಉಣೊಲಿ.. ಬಡವೆರೆಗ್ ಎಡ್ಡೆ ಉಪಕಾರ ಮಾಲ್ತೆರ್ ಅತ್ತೆ ?.. ಅತ್ತಂದೆ ಎಂಕುಲೆಗ್ ಸಮಯ ಕಳೆಯೆರೆ ಕಡಿಮೆ ಖರ್ಚಿಡ್ ಗಂಗಸರಲಾ ಕೊರ್ಪೆರ್ಗೆ.. ನಣ ಬೇತೆ ಎಂಚಿನ ಬೋಡು?.. ತಿಂಗೊಳುಗ್ ನಾಲ್ ದಿನ ಬೇಲೆಗ್ ಪೋಂಡ ಯಾವು, ಇಡೀ ತಿಂಗೊಳ್ ಗಮ್ಮತ್ ಮಾಲ್ಪೊಲಿ ಅತ್ತಣ್ಣಾ ?..
ಸೋಂಪಣ್ಣ: ಅವು ಅಂದ್ ಬೋಂಕು.. ಆಂಡ ಸರ್ಕಾರೊ ಇಂಚ ಮಾಲ್ತ್೦ಡ ಮಾಂತೆರ್ಲ ಇಲ್ಲಲೆ ಕುಲ್ಲೊಂದು ಸೋಮಾರಿ ಆಪೆರ್ ಅತ್ತಯಾ?.. ಬೆನ್ನುನಕುಲು ಇಜ್ಜೆರಡ ಅರಿ ಬುಳೆಪ್ಪಿನ ಯೇರ್ ಪಣ್ ?.. ಎನ್ನಂಚಿತ್ತಿನ ಪರಬ್ಬೆರ್ ಮಾಂತ ನೇಜಿ ನಡೊಂದು, ಬಜ್ಜೈ ಪೆಜೊಂದು ಆಪಿನ ಪೋಪಿನ ಪಾತೆರನಾ?.. ಒಟ್ಟಾರೆ ಉಂದು ಸಮಾಜೊಗ್ ಎಡ್ಡೆ ಆಪಿನ ವಿಚಾರ ಅತ್ತ್, ಬುಡು..
ಬೋಂಕು: ಕೃಷಿ ನಮೊನೆ ದಾಯೆ ಮಲ್ಪೊಡು ಅಣ್ಣಾ ?.. ಸರ್ಕಾರೊನೆ ಕೊರ್ಪೆರ್ ಅತ್ತೆ?.. ತಮಿಳುನಾಡುಡು ಅರಿ ಅತ್ತಂದೆ ಇಡೀ ತಿಂಗೊಳುಗ್ ಬೋಡಿತ್ತಿನ ಉಪ್ಪು ಮುಣ್ಚಿ ಸೇರ್ದ್ ಮಾಂತೊಲ ಕೊರ್ಪೆರ್ಗೆ.. ಅತ್ತಂದೆ ಸೈಕಲ್, ಟೀವಿ, ಜೋಕ್ಲೆಗ್ ಲಾಪ್ ಟಾಪ್, ಬುಕ್ಕು ಮಾಂತ ಧರ್ಮೊಗೆ ಕೊರ್ಪೆರ್.. ಅವು ಪೂರ ಕೊರಿ ಬುಕ್ಕ ನಮೊ ದಾಯೆ ಬೆನೊಡು ಅತ್ತಾ, ಅಣ್ಣಾ ?..
ಸೋಂಪಣ್ಣ: ಅಂದು ಮಾರಾಯ, ಮಾಂತೆರ್ಲ ಇಲ್ಲಡೆ ಕುಲ್ಲ್೦ಡ ಅರಿ ವೊಲ್ತು ಬರ್ಪುಂಡ್ಯಾ ?.. ಯೇರಾಂಡ್ಲಾ ಬುಳೆಯೊಡತ್ತಾ?.. ಇಂಚನೆ ಆಂಡ ಒಂಜಿ ದಿನ ಮಾತೆರ್ಲಾ ಒಟ್ಟುಗೆ ಬಂಜಿಗಿದ್ಯಾಂತೆ ಸೈಯ್ಯೊಡ್ ಆತೆ, ತೂಲ..
ಬೋಂಕು: ಅವು ಅಂದ್ ಈರ್ ಪನ್ಪುನ.. ಅಂಡ ಸರ್ಕಾರದಕುಲೆಗ್ ಆತ್ ಬುದ್ಧಿ ಇಜ್ಜಾ ? ಅಕ್ಲೆಗ್ ಇಂದ್ ಪೂರ ಗೊತ್ತಾಪುಜ್ಯಾ?..
ಸೋಂಪಣ್ಣ: ನಮೊ ಸೈಂಡ ಅಕುಲೆಗ್ ದಾನೆ ಮಾರಾಯ ? ಅಕ್ಲೆಗ್ ವೋಟ್ ಬರೊಡು ಆತೆ ಅತ್ತಾ ?..
ಬೋಂಕು: ಈರ್ ಪನ್ಪುನೆಲಾ ಸರಿ.. ಆಂಡ ತೂಕೊ ಏತ್ ದಿನೊ ನಡಪುಂಡ್ ಪಂಡುದು.. ಯಾನ್ ಇತ್ತೆ ಬೇಲಿ ಸರಿ ಮಾಲ್ಪೆರೆ ಪೋಪೆ.. ಒರಿದಿನ ಸೋಮಾವರದಾನಿ ಬತ್೦ಡ ಮಲ್ಪೆ.. ಆವಂದೆ?.. ಅಕ್ಕೆ ದೋಸೆ ರೆಡಿ ಮಲ್ತೆರ್ ತೋಜುಂಡು.. ತಿನೊಂದು ಪೋಪೆ..
ಸೋಂಪಣ್ಣ: ಆವು, ನಿಕ್ಕ್ ಸರಿ ತೋಜಿಲೆಕ್ಕ ಮಾಲ್ಪು..
(ಮನಸ್ಸುಡೇ) ..ಇಂಚಾಂಡ ಕಂಡೊ, ತೋಟದ ಕೆಲ್ಸ ದಾಯೆ ಮಲ್ಪಾವುನು ?.. ಯಾನ್ಲಾ ರೇಷನ್ ಕಾರ್ಡ್ ಮಲ್ಪಾವೆ, ಅರಿ ಡಿಪೊಡ್ ತಿಕ್ಕುಂಡತ್ತ, ಬೆನೊಡು ದಾಯೆ?..