ಸೋಂಪಣ್ಣ : ಓ, ದಾನೆ ಬೋಂಕು, ಆತೊಂಜಿ ಸೇಂಕುವಾ ?.. ದಾನೆ ಪಿಲಿ ಮಿನಿ ತೂಯಾನ?..

ಬೋಂಕು : ಇಜ್ಜಿ ಸೋಂಪಣ್ಣ, ಪೇಂಟೆಗ್ ಪೋದಿತ್ತೆ, ಒಂಜಿ ಸುದ್ಧಿ ಕೇಂಡೆ, ಈರೆಡ ಪಣ್ಕೊ ಪಂಡ್ದ್ ಬಲ್ತೊಂದ್ ಬತ್ತೆ..

ಸೋಂಪಣ್ಣ : ಎಂಚಿನ ಸುದ್ಧಿ, ಪಣ್ಲ ಬೇಕ..

ಬೋಂಕು : ಗೋಂಕುತಡ್ಕದ ಕಮಲಕ್ಕನ ಮಗಲ್ ವಿಮಲ ಇಲ್ಲ್ ಬುಡ್ದ್ ಬಲ್ತಲ್ ಗೆ..

ಸೋಂಪಣ್ಣ : ಬಲಿಪ್ಪುನೆ ದಾಯೆ? ಬಸ್ಸು ಏತ್ಲಾ ಉಂಡತ್ತಯಾ?..

ಬೋಂಕು : ಅಂಚತ್ತ್ ಸೋಂಪಣ್ಣಾ.. ಆಲ್ ಸೈಕಲ್ ಅಂಗಡಿದ ಇಬ್ರಾಯಿ ಬ್ಯಾರಿನ ಮಗೆ ಸೆರೀಫ್ ಉಲ್ಲೆತ್ತಾ, ಆಯೆನೊಟ್ಟುಗ್ ಊರು ಬುಡ್ದು ಪೋತಲ್ಗೆ, ರಡ್ ದಿನ ಆಂಡ್, ಇನಿ ಮಾತೆರ್ಲಾ ಪಾತೆರೊಂದು ಉಲ್ಲೆರ್.

ಸೋಂಪಣ್ಣ : ಅಂದಾ, ಆಲೆಗ್ ಎಂಚಿನ ಆಂಡ್ ಮಾರಾಯಾ? ಆತ್ ಎಡ್ಡೆ ಪೊಣ್ಜೊ.. ತೂಯೆರ್ಲಾ ಸೋಕ್ ಉಲ್ಲಾಲ್.. ಅತ್ತಂದೆ ಕಲ್ಪುನೆಡ್ಲಾ ಬಾರೀ ಉಸಾರಿ ಇತ್ತಲ್ ಅತ್ತ?.. ಪೋಯಿ ವರ್ಸ ಆಲೆಗ್ ಏತೊಂಜಿ ಪ್ರೈಸ್ ಬತ್ತಿತ್ತ್೦ಡ್.. ಮಾಂತ ಲವ್ ಲವ್ ಪಣೊಂದು ಇಂಚ ಪೂರಾ ಮಾಲ್ತೆರೆಡ ಒರಿದಿನಕುಲು ಮರ್ಯಾದೆಡ್ ಬದುಕುನೆ ಎಂಚ?..

ಬೋಂಕು : ಆಲೆಗ್ 18 ವರ್ಸಲಾ ಆತಿಜ್ಜಿ.. ಈತ್ ಎಲ್ಯ ಪ್ರಾಯೊಡ್ ಎಂಚಿನ ಲವ್ ಸೋಂಪಣ್ಣಾ.. ಅತ್ತಂದೆ, ಆಯೆಗ್ ಮದಿಮೆ ಆದ್ ಮೂಜಿ ಜೋಕ್ಲು ಉಲ್ಲೊ.. ಇತ್ತೆ ಮೂಜಿ ತಿಂಗೊಳ್ಡು ಇಂಚಿತ್ತಿನ ನಾಲ್ ಕೇಸ್ ಆಂಡ್ ಕೇಣುನ..

ಸೋಂಪಣ್ಣ : ಲವ್ ಮಾಲ್ಪುನ ತಪ್ಪು ಪಣಿಯೆರೆ ಆಪುಜಿ. ಆಂಡ ವೊಯಿಕುಲಾ ಒಂಜಿ ರೀತಿ ನೀತಿ ಇಪ್ಪೊಡು ಅತ್ತಯಾ?.. ಆಯೆಗೇ ಸರಿಯಾದ್ ಕೆಲಸ ಇಜ್ಜಿ, ಇಪ್ಪುನೆ ಒಂಜಿ ಲಟ್ಟಾರಿ ಸೈಕಲ್ ಅಂಗಡಿ.. ಐಟ್ ಬರ್ಪಿನ ಆದಾಯೊಡ್ ಇಲ್ಲಲ್ 12 ಜನ ತಿನೊಡು.. ಇತ್ತೆ ನಣೊರ್ತಿನ್ ಕಟ್ಟೊಂದ್.. ಎಂಚಿನ ಆವೊಂದುಂಡು ನಮ್ಮ ಸಮಾಜೊಡು?.. ಅರ್ಥನೆ ಆಪುಜಿ..

ಬೋಂಕು : ಅವೇ.. ಆಲೆಗಾಂಡಾಲಾ ತರೆಟ್ಟ್ ಬುದ್ಧಿ ಬೋಡ್ಚಾ?.. ಮರ್ಯಾದೆಡ್ ಬದುಕೊಂದಿತ್ತಿನ ಅಪ್ಪೆ ಅಮ್ಮೆ ಮಾಂತೆರ್ನ್ಲಾ ಬುಡ್ದು ಪೋವೊಡಾಂಡ ಕಾರಣ ದಾದ?.. ಆಲೆನ ಇಲ್ಲದಕುಲೆನ್ ತೂಯೆರಾಪುಜಿ ಸೋಂಪಣ್ಣ.. ಅಪ್ಪೆ ಬಂಜಿಗ್ ದಾಲಾ ತಿನಂದೆ ಮೂಜಿ ದಿನ ಆಂಡ್, ಅಮ್ಮೆರ್ ಮರ್ಲೆರ್ ಲೆಕ್ಕೊ ಪಾತೆರೊಂದುಲ್ಲೆರ್.. ಏತ್ ಜೋಕ್ಲುಲೆಗ್ ಶಾಲೆಡ್ ಕಲ್ಪಾದ್ ಸಂಸ್ಕಾರ ಕೊರ್ದಿನಾರ್.. ಇನಿ ತೂಂಡ ಆರೆನ ಮಗಲೇ ಇಂಚ ಮಾಲ್ತಲ್, ನಂಬೆರ್ನೆ ಆಪುಜಿ.. ಇಂಚಿತ್ತಿನ ಸಮಸ್ಯೆಗ್ ಪರಿಹಾರ ಇಜ್ಜಾ?..

ಸೋಂಪಣ್ಣ : ಪರಿಹಾರ ಉಂಡು.. ದುಂಬು ಸಮಸ್ಯೆ ದಾನೆ, ಒಲ್ತು ಸುರು ಆಪುಂಡು ಪಂಡ್ದ್ ಯೋಚನೆ ಮಾಲ್ಪೊಡು.. ತೂಲ, ಇತ್ತೆದ ಕಾಲೊಡು ಪೊಣ್ಜೊಲು ಆಣುಲೆಗ್ ದಾಲ ಕಡಿಮೆ ಇಜ್ಜೆರ್.. ಅಣುಲೆಗ್ ದುಂಬುಡ್ದುಲಾ ಕಲ್ಪೊಡು, ಕೆಲಸೊಗ್ ಸೇರೊಡು ಪನ್ಪಿನ ತರೆಟ್ಟ್ ಇಪ್ಪುಂಡು, ಇತ್ತೆ ಮಾಂತ ಪೊಣ್ಜೊಲುಗ್ ಯೇತ್ ಕಲ್ಪುಂಡಲಾ ಕಾಸ್ ಖರ್ಚ್ ಮಾಲ್ತುದು ಕಾಲೇಜ್ ಗ್ ಕಡಪುಡುವೇರ್.. ಆಂಡ ಅಕುಲು ಕೆಲಸಗ್ ಸೇರ್ದ್ ಇಲ್ಲಗ್ ಕಾಸ್ ಕೊರೊಡು ಪನ್ಪಿನ ಬಯಕೆ ಅಪ್ಪೆ ಅಮ್ಮೆರೆಗ್ ಇಪ್ಪುಜಿ ತೂಲ.. ಅಪಗ, ಅಕುಲೆಗ್ ಜವಾಬ್ದಾರಿ ಕಲ್ಪಾವುಜೆರ್ ಪಂಡುದ್ ಆಂಡ್. ಅಯ್ಕ್ ಸರಿಯಾದ್ ಇತ್ತೆ ಯೇರೆಡ ತೂಂಡಲ ಟೀವಿ, ಮೊಬೈಲ್ ಉಂಡು.. ಟೀವಿಡ್ ಬರ್ಪಿನ ಸಿನೆಮ, ಧಾರಾವಾಹಿಡ್ಲಾ ಜೋಕ್ಲೆನ ಮನಸ್ ಹಾಳ್ ಮಲ್ಪೆರ ಎಂಚಿನ ಬೋಡೊ ಅವೆನೇ ಪಾಡುವೆರ್. ಆ ಖಾನ್, ಈ ಖಾನ್ ಪಂಡ್ದ್ ತಿಕ್ಕಿ ತಿಕ್ಕಿನ ಪೊಣ್ಜೊಲುನೊಟ್ಟುಗೆ ಗಮ್ಮತ್ ಮಾಲ್ಪುನೆನೇ ತೋಜಾವೆರ್.. ಅಪಗ ಬುದ್ಧಿಲ ಸರಿಯಾದ್ ಬರಾಂತಿನ ಜೋಕ್ಲು ಹಾಳಾಯೆರೆ ಬೇತೆ ದಾದ ಬೋಡು?..

ಬೋಂಕು : ಅಂಚಾಂಡ ಈರ್ ಪಣ್ಪಿನ.. ಜೋಕುಲೆಗ್ ಇಲ್ಲಾಲೇ ಸರಿಯಾದ್ ಸಂಸ್ಕಾರ ಕೊರೊಡು, ಅತ್ತಂದೆ ಜವಾಬ್ದಾರಿ ಕಲ್ಪಾವೊಡು.. ಸರಿ ತಪ್ಪು ವಿವೇಚನೆ ಮಲ್ಪುನ, ಸಾದಿ ತತ್ತ್೦ಡ ಬದುಕೇ ಎಂಚ ಹಾಳಾಪುಂಡು ಪಣ್ದ್ ತೆರಿಪಾವೊಡು ಅತ್ತೆ?..

ಸೋಂಪಣ್ಣ : ಅಂದ್ ತೂಲ.. ಸರಿಯಾದ್ ಪಂಡ..

ಬೋಂಕು : ಅಪಗ ಸಮಾಜೊಗ್ ದಾಲ ಜವಾಬ್ದಾರಿ ಇಜ್ಜಾ?.. ಇಂಚಿತ್ತಿನ ವಿಷಯ ಪಾತೆರ್೦ಡ ನಂಕ್ ದಾಯೆ ಪಂಡ್ದ್ ಪೊಕ್ಕಡೆ ಕುಲ್ಲುವೆರ್ ಅತ್ತಾ?..

ಸೋಂಪಣ್ಣ : ನಮ್ಮ ಜನಕುಲೆಗ್ ಬುದ್ಧಿ ಬನ್ನಗ ಈ ದೇಶೊಡ್ ಬದ್ಕಿಯರನೇ ಸಾಧ್ಯ ಇಜ್ಜಿ, ಅಂಚಾಪುಂಡ್ ಬುಡ್ಲ.. ಆಂಡಲಾ, ಕಾಲ ಇತ್ತೆಲಾ ಮೀರ್ದಿಜ್ಜಿ.. ಜನಕುಲು ಜಾತಿ-ಗೀತಿ ಬೇಧ ಬುಡ್ದು ಒಟ್ಟು ಸೇರ್ದು ಈ ಸಮಸ್ಯೆಗ್ ಪರಿಹಾರ ತೂವೊಣೊಡು.. ಯಾನ್ ಒರ ಅಲೆನ ಅಪ್ಪೆ ಅಮ್ಮೆರೆನ್ ತೂದ್ ಪಾತೆರ್ದ್ ಬರ್ಪೆ..

ಬೋಂಕು : ಈರ್ ಪಣ್ಪುನೆ ಸರಿ ಸೋಂಪಣ್ಣ.. ಯಾನ್ಲಾ ಬರ್ಪೆ ಈರ್ನೊಟ್ಟುಗ್, ತೂಕೊ ಅಕ್ಲೆಗ್ ಎಂಚಿನ ಸಹಾಯ ಮಲ್ಪೊಲಿ ಪಂಡ್ದ್, ಅತ್ತೆ?..

ಸೋಂಪಣ್ಣ : ಬಲಾ, ಪೋದು ಬರ್ಕೊ..