ಬೋಂಕು : ಸೋಂಪಣ್ಣಾ, ಸುಮಾರ್ ದಿನ ಆಂಡ್ ತೂವಂದೆ.. ಬ್ಯಾಂಗ್ಲೋರ್ ಗ್ ಪೋತಿತ್ತಾರ್ ಗೆ ಅಂದಾ ?..

ಸೋಂಪಣ್ಣ : ಅಂದ್.. ಅವ್ವೇ, ಪೋಯಿ ವಾರ ಎಂಕ್ಲೆನ ದೀಪು ಬತ್ತಿತ್ತೆತ್ತಾ, ರಜೆಟ್ಟ್?, ಆಯೆ ಪಿರ ಪೋನಗ ನಾಲ್ ದಿನೊಕ್ಕ್ ಬಲ್ಲೆ ಪಂಡ್ದ್ ಎನ್ನನ್ಲಾ ಕಾರ್ ಡ್ ಕುಲ್ಲಾದ್ ಲೆತ್ತೊಂದ್ ಪೋಯೆ.. ಅಂಚ ನಾಲ್ ದಿನ ತಿರ್ಗೊಂದ್ ಬತ್ತೆ ತೂಲ..

ಬೋಂಕು : ಎಡ್ಡೆ ಆಂಡ್ ಬುಡ್ಲೆ.. ಮರಿಯಾಲ ಅತ್ತಾ, ತೋಟದ ಕೆಲ್ಸಲಾ ಎಚ್ಚಿಗೆ ಇಜ್ಜಿ.. ಪೇಂಟೆ ಮಾಂತ ತೂಯಾರಾ?..

ಸೋಂಪಣ್ಣ : ಎಂಚಿನ ತೂಪುನೆ ಮಾರಾಯ.. ಓಡೆಗ್ ಪೋಂಡಲಾ ಗಂಟೆಗಟ್ಲೆ ರೋಡುಡೇ ಕಾಪೊಡು.. ಟ್ರಾಫಿಕ್ ಜ್ಯಾಮ್ ಪಂಡ್ದ್.. ಓಲ್ ತೂಂಡಲಾ ಜನನೇ ಜನ.. ಒಂಜಿ ಬರ್ಸ ಬತ್ತ್೦ಡ ರಸ್ತೆಡ್ ಮಾಂತ ನೀರು ಉಂತುದ್, ಕಾರ್ ತಿರ್ತ್ ದೀಯೆರ ಆಪುಜಿ, ಬಜೀ ಕುರ್ತೆಲ್, ಎಂಚಿನ ಪಂಡಲಾ, ನಮ್ಮೊ ಊರೇ ಎಡ್ಡೆಯಾ..

ಬೋಂಕು : ಅಂದ್ ಗೆ, ಯಾನ್ಲಾ ಕೇಂಣ್ದೆ.. ರಡ್ಡ್ ದಿನೊಟ್ಟೇ ಸಾಕಾಪುಂಡು ಪಂಣ್ದ್.. ಅತ್ತ್ ಸೋಂಪಣ್ಣ, ಬೆಂಗ್ಳೋರುಡ್ ಓಲ್ ತೂಂಡಲಾ ಮಾಲುಂಡುಗೆ ಅಂದಾ ?..

ಸೋಂಪಣ್ಣ : ಮಾಲಂದೆ ದಾನೆ ಅಪುಂಡು ಪಣ್ಲಾ ಬೋಂಕು.. ಸಾದಿ ಸಾದಿಡ್ ಬಾರ್ ಲಾ ರೆಸ್ಟೋರೆಂಟ್ ಲಾ ಉಂಡು.. ಜನಕ್ಲೆಗ್ ಪರ್ಪುನವೇ ಬೇಲೆ ತೋಜುಂಡು..

ಬೋಂಕು : ಅವ್ ಅತ್ತ್ ದನಿ.. ಯಾನ್ ಪಣ್ಣೆ, ಅವ್ವೇ, ನಮ್ಮೊ ಜನತಾ ಬಜಾರ್ ಲೆಕ್ಕೊ ಉಪ್ಪುನ ಐಡ್ದುಲಾ ಮಲ್ಲೊ ಮಲ್ಲೊ ಅಂಗಡಿಲ್ ಏತುಲಾ ಉಲ್ಲೊಗೆ ಅಂದಾ?.. ಒಂಜೊಂಜಿ ಮಾಲೇ ನಮ್ಮ್ ಪೇಂಟೆದಾದ್ ಮಲ್ಲೆ ಉಂಡುಗೆ?..

ಸೋಂಪಣ್ಣ :ಓ, ಮಾಲ್, ಮಾಲ್.. ಗೊತ್ತಾಂಡ್.. ಅಂದಿಯಾ.. ಒಂಜೊಂಜಿ ಮಾಲುಲಾ ಎಕ್ರೆಗಟ್ಲೆ ಜಾಗೆಡ್ ಕಟ್ದೆರ್.. ಉಳಯಿ ಪೋಂಡ ಇಡೀ ಲೋಕೆನೇ ಉಂಡುಯಾ.. ನಾಲೈನ್ ಸಿನೆಮಾ ಥಿಯೇಟರ್ಲಾ ಉಪ್ಪುಂಡು, ಪತ್ತ್ ಪದಿನೈನ್ ಓಟೆಲ್, ನೂದು ಇರ್ನೂದು ಅಂಗಡಿಲು, ಯಪ್ಪ.. ತೂಂಡ ತರೆ ತಿರ್ಗುಂಡು.. ಬೆಂಗ್ಲೋರ್ ದಾಯೆ, ನಮ್ಮ ಕುಡ್ಲೊಡೆ ಉಂಡತ್ತ ಅಂಚಿತ್ತಿನವು?.. ಆಂಡ ಯಾನ್ ತೂತಿನ ಭಾರಿ ಮಲ್ಲೆ ಉಂಡಿಯಾ.. ಇಂಚಾಂಡ ನಮ್ಮೊ ಶೆಣೈ, ಶೆಟ್ರೆನ ಅಂಗಡಿಲುನು ಮಾಂತ ಕೇಣುನಕುಲು ಇಪ್ಪುಜೆರು ಅತ್ತಾ?..

ಬೋಂಕು : ಅತ್ತ್, ಒಂಜೇ ಕಡೆಟ್ ಮಾಂತಲಾ ವಸ್ತುಲು ತಿಕ್ಕುಂಡು ಪಂಡ ಎಲ್ಲ್ಯೆಲ್ಲ ಅಂಗಡಿಲೆಗ್ ಯೇರ್ ಪೋಪೆರ್?..

ಸೋಂಪಣ್ಣ : ಅಂಚತ್ತ್ ಬೋಂಕು, ಅವ್ಲು ಪೂರಾ ತೂಯೆರ ಸೋಕು ಇಪ್ಪುಂಡು ಅತ್ತಂದೆ, ಶೆಟ್ರೆನ ಲೆಕ್ಕೊ ಕುಲ್ಲಾದ್ ಚಾ ಕೊರ್ದು ಸುಖ ದುಃಖ ಪಾತೆರುನಕುಲು ಏರುಲ್ಲೆರಿಯಾ?. ಈ ಎಂಚಿನ ಪಂಡಲಾ, ಮನುಷ್ಯತ್ವ ಪನ್ಪೆರತ್ತಾ, ಅವುಲಾ ಬೋಡು, ಬಜೀ ಕಾಸ್ ಮಾಲ್ಪುನವೇ ಆಂಡ ಎಂಚ?. ಎಂಕು ಆ ವ್ಯವಸ್ತೆ ಓಂಚೂರ್ಲಾ ಸರಿತೋಜಿಜಿ..

ಬೋಂಕು : ಅವ್ ಅಂದು ಈರ್ ಪಣ್ಣೆ, ಏತೊ ಸರ್ತಿ ಕೈಟ್ ದುಡ್ದು ಇಜಾಂಡ ಎಲ್ಲೆ ಕೊರು ಪಂಡುದು ನಮೊಕ್ಲು ಸಾಮಾನು ಕೊರ್ಪೆರು, ಆ ಮಾಲ್ ದಕುಲು ಕೊರ್ಪೆರ?.

ಸೋಂಪಣ್ಣ : ಅವುಲಾ ಸರಿ.. ದಿನ ಪೋಯಿಲೆಕ್ಕೊನೆ ನರಮನಿಗ್ ಬೆಲೆ ಕಮ್ಮಿ ಆವೊಂದು ಪೋವೊಂದುಂಡು, ಬಜೀ ಥಳಕ್ ಬಳಕುಗು ಮರ್ಲ್ ಕಟ್ಟುವೆರ್.. ಹೂಂ.. ಮಾಂತ ಕಲಿಕಾಲೊದ ಮಹಿಮೆ..

ಬೋಂಕು : ಇಪ್ಪಡ್ ಸೋಂಪಣ್ಣ, ನಮ್ಮ ಕಾಲೊಡೆ ಎಂಚಿನ ಮಾಂತ ತೂಯೆರ ಉಂಡೊ ಯೇರೆಗ್ ಗೊತ್ತು ಅತ್ತಾ?.. ಯಾನ್ ಬರ್ಪೆ, ಗಣೇಶಣ್ಣೇರ್ ಎಲ್ಲೆ ತೋಟೊಗ್ ಮರ್ದು ಬುಡೊಡು ಪಂಡಿತ್ತೆರ್, ಒರ ಪೋತು ಮಾತೆರ್ದು ಬರ್ಪೆ..

ಸೋಂಪಣ್ಣ : ಒಂತೆ ಉಂತುಲಾ ಬೋಂಕು, ಚಾ ಪರೊಂದು ಪೋಲ.

ಬೋಂಕು : ಆವಪಗ..